今日係2017年7月15日,距離三十歲前還有621日,我唔知依段係長定短的時間,但每過十年就好似係一個階段完結,所以好多唔同類型的書都會話三十歲前,四十歲前該做幾多件事,亦係一個原因驅使我去寫依篇文章,而大家睇到的時候應該會係2019年我三十歲當天,而這六百多天,我會定時更新延續依篇故事。

我係一個唔太樂觀的人,甚至可以話係悲觀主義者,唔存在任何希望。好似2017年的立法會議員被人DQ,這個世界唔存在絕對公義,我唔相信世界有公平,所有野都存在黑暗面。不過我想表達的唔係政冶立場和對世界的抱負,甚至反社會主義。而我指的係自身方面,對於三十歲的我,唔覺得會變成一個成功的人,亦唔洗旨意今天訂立的目標會百分百完成。(好似2016年說好的目標正正是我失敗的例子)

唯一令我寫下的原因是紀錄我存在的故事,走過一段普通的路,又或者間接提醒自己要努力向前走,一個好弱雞的動力去push自己,我要努力!不過最後結果如何,希望三十歲的你還能夠抱著天真的心態,笑一笑吧!

 

目標

  1. 考車牌
  2. 去歐洲旅行 (一直以來,好努力儲左5萬Asia Miles)
  3. 跑2000km
  4. 成功學一種樂器
  5. 成功學一種語言
  6. 升職 !
  7. 學識煮一道菜 !

今日係2018年9月10日

上年的目標,好似嚴重落後,大事主要兩件,去左德國同轉左工

考車牌 => 雖然經過德國的驚險之旅,但唔會驚左揸車,但暫時未有時間去考,希望至少明年已報名

歐洲旅行,已經去了德國,同好努力儲左7萬AM,6萬AV,係時候要計劃下個目的地

跑2000km應該無咩可能,不過至少轉左工,開始跑返步,依家都有雙位數字,可能縮減目標到4位數字?

樂器,說好的自學,沒有恆心的人,依家轉左工多左時間,要set好目標,重學口琴,一切從簡

語言,去完德國,突然有衝動學德文,但放低左好耐的西班牙文 = =

升職,我估應該無望,雖然過去左的四月升左做staff software engineer,但依家又變返Senior 🙂 隨緣

學識煮一道菜,哈哈,好似無咩可能,太懶了,連前排煮意粉都好難食….

 

30歲前,繼細個的人生意義和如何得到快樂,轉變成今日的新問題,我唔知道呀

究竟個答案係咩野 ?

加油!努力!


今日係2019年3月19日,距離30歲靜返9日。但由於黎緊會去旅行,所以提早打左30歲的記錄和回望目標。

  1. 考車牌 => 失敗,明明轉左工,多左時間,但無去做,旅行返黎要認真實行
  2. 去歐洲旅行 (一直以來,好努力儲左5萬Asia Miles) => 成功,已經2018年5月去左德國,再加上12月去左西安,聽日去尼泊爾,得返3萬8 AM 同 8萬AV
  3. 跑2000km => 失敗,由9月開始跑到今日,跑左231 km,得十分之一 🙁  可能半年300km實際d….
  4. 成功學一種樂器 => 失敗,雖然嘗試過,但沒有動力去做
  5. 成功學一種語言 => 失敗,typescript, golang? 應該唔算做一個lang吧!
  6. 升職 ! => 失敗,唉….仲未清楚了解自己的能力
  7. 學識煮一道菜 ! => 失敗,依排成日煮台灣伴面,但同公仔面無分別  🙁

 

30歲快到,上面的目標明顯唔達標,要好好努力做!

到現在我仍然唔明白生命的目的,可能一輩子都是這樣一個人下去。

或者我沒有機會回來?食家明!

很多人都會問為什麼去尼泊爾,行咩山,對於我的舉動很出奇

不過這樣很符合我的性格,由當年想去西藏,到獨遊世界,我發現自己也不知道想要什麼

對於內心有無限的問號,明明想但又唔講出口,明明唔想又強行去做,喜歡不喜歡,快樂不快樂

前排做左個MBIT test,再次發現自己是INTJ-T,一個少有的性格 (“建築師”人格)

 

面向很多人總有一種難以融入的感覺,自己的世界跟其他人很不一樣

思考和處事方式經常杞人憂天,思考著無邊際的事,亦因為咁三十年來一事無成,談不上有什麼貢獻

喜歡一個人自在的時間,沒有局限和顧慮,一個人行山,一個人看電影,一個人旅行,一個人說話

不過卻害怕孤單,如果有人聆聽,有人陪伴,有人分享,有人一起解決問題就更好

有時收收埋埋,好多野想講,亦只可以係度表達出黎。

 

回歸正題,三十而立,希望看己不再猶疑不決,不再憂心掛肚,不再刻意收藏,我就是我,為了自己而活

 

依次尼泊爾旅行(20/3 – 5/4)將會明天開始,有9日時間行ABC(Annapurna Base Camp)及可能在山上四千多米度過30歲生日,之後五日行程未定,好多未知數,再加上ABC大雪,令到我更擔憂。

不過生命就是充滿無限可能,希望這趟旅行能平安歸來,雖然擔心風雪和高山反應,但係唔可以因為怕而唔去做,去完成其中一項check item和挑戰。(有興趣follow twitter)

如果沒能回來,不用擔心,沒有什麼遺憾,一生人平淡而過,沒有什麼悲,沒有什麼苦,已經是一種樂。

感謝一路上出現的人,不能單單透過文字表達的謝意,願大家安康快樂!

可能這樣就是我的一生,雖然未寫完,但至少我存在過。

謝謝觀看!