Tag: 日本

旅遊記錄

關西中部旅遊(五) 金澤 > 近江町市場@兼六園@東茶屋街@21世紀美術館

今日開始轉入日本中部,用左高山北陸JR Pass由京都去金澤,約兩個多小時就到了。 先去酒店(金沢セントラルホテル, Kanazawa Central Hotel)放低行李,貪佢近金澤站,方便第二日一早去白川,同埋都唔算貴,hk$300。 買左個金澤 觀光巴士一日(城下まち金沢周遊バス),500Yen,幾方便,去某些景點有平(21世紀美術館…etc) 1. 近江町市場 其實大阪有黑門市門,京都有錦市場,但我知道今日會去近江町市場,所以都沒有去前兩者。 繼上次係九州的唐戶市場後,今次係第二次去魚市場,個感覺好唔同,依個依街市多d。除左海鮮外,仲有肉類疏菜同其他雜貨,所以依個應該似香港的街市多d。(還是喜歡唐戶市場,那種道地的魚市場) 其實都唔係好大,好快就行完一圈,而場內都有一些餐廳,亦有些地方可以即買即食。 有菜買,全部都包好晒,好有條理。   最多的係海鮮,好想食,但價錢都唔平,而我就食左海膽,即開即食。 最後就食返個魚生飯作結。 2. 兼六園 日本三大名園之一,可惜去不合時,據說春夏秋冬各有特色,而我去的時候係冬尾(沒有雪)。 景觀一般,而內裡也不算大。 大家會見到每棵樹都有條繩,好似傘一樣緊貼在樹上。其實係冬天的防雪吊繩,令樹木免受雪傷害。 入面有湖又有瀑布,寫意,又有時雨亭供人停下來休息,喝杯茶。但個人還是喜歡前日去的本坊庭園,小而靜。 3. 東茶屋街 回到門口,再乘觀光巴士去東茶屋街,觀光巴士都幾得意,仲有唔同顏色ge。 茶屋在江戶時代是觀賞藝妓表演的場所,而現今的東茶屋街,就好多餐廳和飾物店。 規模就無京都咁大同長。 首先食左金箔雪糕(金箔の箔一),實際上無咩味道,但價錢都唔平,可以食到2-3杯雪糕。 果度所有野都主打金,好多金箔的副產品。而我就唔識欣賞喇,究竟係咪有金就好,定純粹裝富豪,高人一等。 4. 21世紀美術館 21世紀美術館係一個幾特別的地方,我原本以為美術館會比較似藝術中心,有好多畫同展覽。 但實際上唔係,佢以當代藝術,配合充足的空間展覽,而分左兩種價錢的門票。 我唔係咁識藝術,所以買左較平果個,入面有7個展品。 門口就有三個免費的。 最出名應該係依個,泳池可以望落去,望上去。(中間其實只係一塊透明玻璃) 而除左依幾個展品,仲有好多高深度的影片,而我就睇唔明。 另外去的時候都要排一陣隊買飛,同埋要放個袋入locker,相信我只會去一次。 最後就返左金澤車站食飯,同行街,再買左個甜品Royce朱古力布甸。 金澤其實唔係好大,但都幾靜同小巧。原本打算去機舖,但都係算了。  
旅遊記錄

關西中部旅遊(四) 京都 > 嵐山@小火車@北野天滿宮@金閣寺

黎到第四天,去到其中一個最期待的行程,(嵯峨野)嵐山小火車。 還記得同事及之前朋友寄給我的post cards都是傳說中的嵯峨野火車,對於我來說還是喜歡火車,在悠長的路軌上行走,按著一條寄定的道路上行走,跟我的性格一樣,依著命運行走。 1. 嵯峨野遊覽小火車 首先是由京都JR去到馬堀站,步行往トロッコ龜岡駅(正常是十分鐘路程)。 由於去到已經9:25分,我見到同時下火車的人跑起來,而我跟著跑,趕乘往嵐山站9:35分開出的車。 真的很趕,買到飛及成功上到車。(可能是平日關係,還是有小小位) 起點有一些狸貓,好有神秘感,同時展開嵐山小火車之旅。 雖然我唔係買第5卡(開放式車廂),但我都走左過去,真的很大風。 小火車會沿著保津川溪谷,欣賞到枯枝(如果春天/秋天應該會好好多),同時又會穿過數個山洞,我在想會否穿越會不同的時空,哈哈。 最後二十分鐘就到左嵐山站,當然要同真火車影相。 於是之後沿著散步策行了嵐山。 首先經過小倉池,一個小小的湖仔。(令我懷念金麟湖,一個人吃午餐的悠閒) 好快就會見到常寂光寺,因為要收費,所以沒有入去看,但日本的寺名好有意思,常寂,無人入去睇,好孤單。 很喜歡日本的藍天,還有路邊的梅花。 行在樹蔭下,我成日諗會唔會好似宮崎駿故事中,走入神秘的世界。 之後發現了一些梅花,沒有人,只有我與阿梅,在樹下一個人,是一種落漠? 去到盡頭,就會見到二尊院,同樣是要錢,也沒有進去了。 往回走,再左轉就是落柿舍(一個詩人的故居) 之後走過另一邊去到竹林深處,找不到人家,但好多遊人。 最後到了野宮神社,細小的。 最後有條商店街,有野當然要食,咸ge。 往渡月橋會見到天龍寺,又係要錢= = 兩旁都有好多餐廳同商店,都幾多野食同睇。 而依條就係渡月橋,在係河邊都幾寫意,但好凍好大風。 隨意走進間餐廳聽左個set,幾得意。最特別係右上果個涼豆腐蕎麥麵,另外個魚(凍)都幾好味。(本人不太喜歡漬物) 食飽飽就要行一行,但沒有櫻花。 之後就搭京福電氣返市區,原先以為係火車,但好短,落車先要點票。 2. 北野天滿宮 嵐電終於去到北野白梅町駅,之後就步行往北野天滿宮 行左都十幾分鐘就到,外國遊客不算多。 入面好多梅花,好靚。 日本寺廟入面其中一項特別是求籤,個籤筒好大個,每個人都雙手搖枝籤出黎,同黃大仙果d好唔同。 下一站係步行往金閣寺,成程唔都見唔到其他遊人,但我靜係知好倦。中途經過平野天神宮。 路途上見到寒緋櫻。 3. 金閣寺 去到金閣寺,真的很多遊人,排左十分鐘終於買到飛。而張飛好似一道符,幾特別。 而這個就是金閣寺,其實無咩特別。 臨走時,食左唔知第幾次雪糕,最後就打道回酒店(乘巴士回四條烏丸果邊)。 因為前幾日太chur,每日行成幾公里,所以頂唔順返左酒店休息。唔係ge話會去梅小路果邊行下,但真的頂不順。 晚餐就在tabelog選了酒店附近人氣較高的拉面店 (和醸良麺) 我覺得好正,個面幾好食(好濃味)。首先間店外邊 (睇相吧) 是很平凡,係一條巷仔。 入到去有部自助點餐機(似一蘭,但靜係得中文),我隨意選左個,跟住入去。 入面就係個bar檯(有d屋台feel),大家都圍住個廚房食,感覺好親切,見到佢地幫人加飯/面。 不過我唔識日文,佢地之後終於知道,也沒有再問我野,哈哈。 = = (其他全部日本人) 最後走左去行返河原町一帶,去左tokyu hands買野,幾好行。 好多野都想買,但想到仲有咁多日的行程走黎走去都無買。 原本想去食抹茶甜品,但十點已經收左,錯過左了:( 唯有食haagen daz 限定補數,飽飽了。
旅遊記錄

關西中部旅遊(三) 京都 > 伏見稻荷@清水寺@衹園

黎到旅程的第三天,首先離開了airbnb,開始用五日高山北陸JR Pass,搭JR由大阪去京都,其實都幾快。 而黎緊兩日就會住京都,Smile Hotel Kyoto(京都四條微笑酒店),交通好方便。如果唔係有優惠的話5900Yen住兩晚,否則都要住離市區好遠。 再見了萩ノ茶屋,一個超級細的站,要普通列車才會停週。其實我好配服日本人興建咁多鐵路,一個細站可以有成六條,而按照唔同的速度而讓唔同列車經過。有時候諗唔會好晒資源,不過這樣也沒有辦法,點都要開多支thread去支援multi task。 等左十幾分鐘,終於有車,先去天王寺JR,開始用Pass,搭去大阪,再轉車去京都。 去到京都放底行李,已經差不多十一點,跟住要去第一站伏見稻荷神社,最簡單的方法係去稻荷駅,走過去就是。 原本打算去間居酒屋,但好似全日文,又無人,所以就隨便去左間快餐食。 其實一開始無留意到佢係CoCo壹番屋,因為門牌是寫住係祖母的咖哩飯,完住無寫住CoCo架。 不過知道今日主要走兩個京點也快快吃完,跟香港差不多的。 1. 伏見稻荷神社 成朝落雨,去到伏見稻荷依舊下起雨,但京都街頭好多人著住和服。 即使落雨,稻荷神社依舊好多人,相對好難影到張無咩人的相。 狐狸神 無盡的鳥居,要行到好入要少人,同埋都好長,要不斷行入去,但我無行到最頂。 門口兩旁都有些小食 2. 清水寺 +  衹園 由稻荷神社去清水寺就複雜d,要去到東福寺JR落(記得左轉直行一條大路就見到巴士站,記得睇清楚方向),再搭巴士去清水道。 再次見到梅花 依度應該係三年坂,有好多間西尾八橋,感覺就似澳門的鉅記,不停有得免費試食。 過左個幾個坂,好快就上到清水寺門口,不過總算停了雨。 必拍位置,沒有櫻花的襯托,有點頹。 行返落去的時候,發現了初音,清水寺,初音手信。 京都最特別係仍保留好多古舊建築。 行到最盡就會見到八坂神社。 花見小路,沒有見到藝妓 花見之路,最盡頭係建仁寺,要收費,所以沒有再進了。 其實有諗過去果度食,但一個人就廢事。 返左去河原町找野食,隨便搵個地方吃。 河原町果邊都幾好行,好多野買,但好早收,9點幾就好多店收晒。 最後去左機舖夾公仔,當然係Epic Fail,仲見到有Puzzle and dragon。 係周圍都見到依張poster/廣告,大家估唔估到賣咩野? 原來係貼紙相機,真係唔講唔知。 今日的行程唔算多,主要稻荷同清水寺,但就由清水寺行去河原町,再行返去四條的酒店。
旅遊記錄

關西中部旅遊(二) 神戶 > 生田神社@北野異人館@中華街@神戶港@ 大阪 > 道頓堀

大阪除左購物和環球影城外,也沒有什麼吸引的景點,所以就決定去神戶。 神戶係一個令我覺得驚喜的地方,重新找回上次去門市港果種平靜和悠閒。第一日主要在大阪市,雖然參觀左大阪城,但梅田的現代化和密集令人覺得腳步依舊急促,只是轉換了個地方而已。但神戶的感覺人不算多,節奏慢很多,悠閒的生活挺不錯。 買左阪神電車一日券 (500Yen),可以即日大阪來回神戶,較阪急一日券平,只要在梅田旅客中心就可以買。 1. 生田神社 在三宮站下車後,沒有買到觀光巴士就直接去北野異人館,而去的途中因為見到幾近,所以就加插了生田神社。 這個神社很小,也沒有什麼特別,入面有個生田之森的小園林,所以好快就行完。 2. 北野異人館 因為以前好多外國人在神戶定居,所以有好多西洋風格的建築,慢慢就形成了異人館。 要去北野異人館街就要繼續向山行,要走過一條斜路,但沿途都有野睇。 第一間遇見的係上山斜路的Starbucks,外觀幾得意。 一上到去就會見到北野天滿神社,但見到樓梯就怕怕了,沒有走上去。 依邊就聚集左好多異人館,有風見鶏の館,英國館,丹麥館等等。 但每間都要錢,而我估入面應該沒有什麼特別,不太值得入去,所以只是在外國看看而已。 由於好多間都要不停上山落山,好辛苦,之後就沿路落山。 3. 元町 (中華街 + 元町商店街) 係山上食左午餐(係超市買左野上山食),之後再睇下附近有間好抵食的可樂餅,森谷商店,好抵依。食唔到神戶牛,只好依個可樂盒頂住先。 之後就去行元町商店街,不過旁邊係中華街,又好多野食。不過始終唔太吸引,食左個包就算了。 但好多受歡迎,好幾間都排長龍,所以中華料理應該都會好食。 我見到最多係類似北京填鴨的小食,但要成500Yen,都唔平。 另外亦有專做香港點心,而我就無試。 而依個包就係將個扣肉放中間,依家睇返都好邪惡。 食飽飽就繼續行元町,旅遊指南說由元町一番行到六番,再去到神戶港,二十分鐘,但實際上應唔止。 行到真係好累,不過兩邊總算有d野睇,種類比起住果邊的商店街多元化,種類多好多,而感覺價錢也很平民化。 4. 神戶港 去到崖邊,就係兩個大商場UMIE同埋MOSAIC,感覺上依兩個商場都幾多野行,種類都好廣泛,不過我真的累到行唔到了,成日行左好多公里。 左面就可以望到神戶塔(Kobe Port Tower),幾正。係海邊坐著,吹住海風,回味返門市港的感覺。 每個海港總會有摩天輪,而旁邊就係麵包超人博物館,可惜我太大,無入去參觀。但果一層都好多野食,好多野買。 休息咁上下,就打道回大阪,而返去其實都唔係好耐,大約個零鐘,幾方便ge,可惜果日行太多路。 5. 大阪 難波 + 心齋橋 + 道堀頓 + 日本橋 返到難波已經六點半,仲開始落雨,於是去左自由軒食咖哩飯。 無咩特別,純粹一試。 道頓堀其實好多野食,但落雨,無咩人,氣氛麻麻,而腳又爆倦,所以走走,逛了bic Camera,也沒有找小吃。見到蟹道樂,串燒店,金龍等等餐廳 當然黎到就要影返張固力果個牌度影相,真的落雨很難拍。 最後當然唔少得排隊買返個Pablo半熟芝士蛋糕,再配埋個櫻花啤酒,一個人食左成個都幾多。(分左兩餐食)  = = 好誇張,但同我想像的味道唔同,不過令我劃上完美的句號,兩日大阪遊。 另外其實有行過去日本橋果邊睇動漫野,但差唔多九點幾,果邊幾靜,又落雨同拎住個蛋糕,所以都冇咩點睇,行左陣就閃返去。
大阪城
旅遊記錄

關西中部旅遊(一) 大阪 > 新世界@通天閣@天王寺動物園@四天王寺@大阪城@HEP FIVE摩天輪@梅田空中庭園

第一天,凌晨機到步,苦等了個多小時才入到境,差不多凌晨兩點。由於想慳返d錢,所以決定訓機場,等到天光一刻就出市區。 大阪空港其實都算幾多人訓機場,而早前朋友說機場酒店附近有個位提供地方睡,較外面安全。 實際位置於(Aeroplaza 2/F),係burger king對面,但跟外面的分別只是類似有一間房,門口有人看守,而裡面全是一排排的櫈。 好處係無咁開揚,同起碼有人看管及借”被”。 可是我去到的時候已經滿了,沒有位訓,只好係門口附近的櫈。   三點幾訓著,到五點醒,周圍的人都走晒,得返自己一個訓街,成個情形都幾怪。 即係起身執野走人,成個機場通宵開的舖頭得M記/Burger King/便利店同すき家,所以唯有去食牛肉飯。 食完就起程出市區,買左大阪周遊券(南海關空版),2900Yen,包南海鐵路出市區+一日大阪周遊卡。 大阪周遊卡包28個免費景點和一日任搭部份私鐵及大阪市地鐵,所以第一日的行程好緊湊,要盡量去好多地方。 http://www.osaka-info.jp/osp/cht/facility/free.php 不過第一站係先去airbnb的host,放低行李,屋主住四樓,下面三層似酒店間左幾間房,每層有兩個廁所。 同相中一樣,空間不是很大,只有一張床,但房同廁所好乾淨,所以第一次住airbnb的經驗都唔錯,而純粹只係一個住的地方。 交通算方便,起碼在市中心,但離鐵路有點遠,每天都要走十五分鐘的商店街,可以細看到早上和夜晚日本的生活。 https://www.airbnb.com.hk/rooms/8868834 上一次去九州,只是行過近中州果條商店家,但今次行左好多條,感覺強烈好多,商店街就好似我地的街市,咩都有得買,而民居就鄰近商店街。  1. 通天閣 第一站,通天閣,一個具歷史性的展望台。 在展望台,可以望到整個大阪市,密而不高,對比香港的高樓大廈黎講,這是一種廣闊的美,香港只會見到前面的高樓而看不清後面,所以日本的密集美有點震撼和闊。 通天閣彷照巴黎鐵塔的瞭望塔,意思是引領大阪日本步向天空和世界,雖然現在不是很高和舊,但正好好認識一下這個地方的歷史。 而附近是新世界,有好多野食,好多餐廳都幾特別,有炸串,八爪魚丸。 2. 天王寺動物園 正因為好近同用左一日周遊卡,所以順道參觀天王寺動物園,好多小朋友,而當然仲有我依個大朋友。 入面分左非洲動物,熱帶雨林,鳥類等區域。其實好細,動物種類同台北動物園差好多。 不過都有羊,獅子,老虎,長頸鹿,大象,北極熊,袋鼠,好似貓等動物。 行左成個鐘,最終仲蕩失路,走唔出返黎,要睇地圖走。 一個棉羊,繼上次清境後再接觸羊,其實佢地都幾”烏糟”,哈哈 兩隻貓科動物,困在寵中,來回踱步,有資勢。 而北整熊都冷冷閒係度訓。 其實係正市區都唔錯,幾方便,隨時都可以去看看圖物,好多一家大細,好適合親子遊玩。 最正係細路可以坐下下面的車,被推著遊玩動物園,近得意,但慘在大人推車仔。 最後係近天王寺站個出口走,再見了可憐的動物們。 好鍾意日本的天空,藍天白雲,而外面公園就好多人郊遊和玩樂,好寫意。 3. 四天王寺 原本打算搭地鐵去,但四天王寺係站中間就只好慢慢行過去,途中見到好多得意野,好好體驗日本的生活。 我見到依間屋,返左黎search原來係一間餐廳(びっくりドンキー),都幾多人食,唔知好唔好味呢。 其實都唔算近,行左好幾個字,終於到四天王寺,入左去中心伽藍,但這個地方很莊嚴,也沒有拍太多。 之後去埋個本坊庭園,只有兩三個人,一個好寧靜的庭園,又有梅花,同時休息了一會兒再重新上路。 4. 大阪城 之後就搭車去谷町四丁目,然後行過去大阪城。行過去途中經過NHK同大阪歷史博物館。 繼上次熊本城,今次黎到大阪城,入面講左大阪城的歷史,但不太感興趣,入面又超焗,所以係天守閣影左幾張相就落返黎。 跟住去左西之丸庭園,應該會有櫻花,但太早只得枯枝,不過望去大阪城又有另一種美。 5 梅田 HEP FIVE 摩天輪 跟住就去左梅田,梅田真係一個好繁忙的地方,比起旺角複雜好多倍,我真的剪失路。 由於周遊卡的關係,當然要試下一個人坐摩天輪,幾得意的感覺。 一個人哼著幸福摩天輪,望著快要下山的夕陽,但好快就轉完一個圈,萬般感受。 不過個玻璃/膠面都幾花幾唔乾淨,但係一個體驗,去看這個大阪市。 落到黎,六點幾,去左北極星蛋包飯,味道正常,沒有什麼特別。 6 梅田空中庭園 吃過晚飯,一日最後的行程係梅田空中庭園,係梅田真係搵左好耐,有一條隧道為入口,沿住就會到達目的地。但入口極奇難搵,來來去去阪急,阪電,又轉左轉右,跟住google map迷失了半個小時。   不過真係幾值得去,去到要排一陣隊,上到去幾靚。但戶外果層超凍,超大風。 望住晚間的大阪,同上次係長崎的夜景又另一留姿味,闊而光。 最正係月亮底下的大阪,同埋食左第一餐雪糕。 最後就10點幾返去airbnb,真的很累,為了一日遊而走了許多景點,再加上只訓左三個鐘,超chur。 如果有時間一定要去堆其他免費入場的地方,用盡張大阪周遊卡,我也想去大阪生活今昔館,道頓堀水上觀光船,大阪市立美術館,天保山大摩天輪,帆船型觀光船 聖瑪麗亞號,大阪府咲洲行政大樓展望台,不過時間始終唔夠,買兩日又唔抵。
展望台
旅遊記錄

關西中部旅遊 (前篇)

前言 說好的一年一次旅行,早在上年開始部署,所以一直留意見平機票,終於十月尾買了大阪去和名古屋返的機票。 對於我來說,一個人去旅行已經不是第一次,還記得我的第一次是去九州。兩年後,當然想再去過日本,所以選了關西大阪入,中部名古屋走,來一次橫跨關西大阪 > 京都 > 金澤 > 白川 > 高山 > 名古屋的九天之旅。 日本給我的感覺是忙中帶靜,既有鬧市,亦有郊區的靜。 因為時間倉促,而且又要計劃第二個旅程,其實行程也沒有太多計劃,出發前主要準備的是住宿和JR Pass。 機票 香港快運 UO874       香港機場         20:10 – 00:35  到關西機場 香港快運 UO657  名古屋中部機場   13:25 – 16:55  到香港機場 去程沒有加行李,只帶了一個 20″ Hand Carry 行李,回程加了20Kg,花了差不多一千蚊來回加回往行李。 因為要慳錢同不同城市出入,所以就選左香港快運 HK Express (第一次) 酒店 主要在Yahoo Travel 訂,因為當時有滿10000Yen 平5000Yen的推廣,好抵。同埋又book左兩間airbnb,總共9日8夜,花左2000左右。 另外大家都可以去Jalan,樂天訂,建議格價,4Travel幾好用,類似Trivago/hotelcombined/skyscanner。 Jr Pass 係縱橫遊預先買高山北陸地區周遊券(¥13,500),當然我實會格價,佢最抵HK$836,比起EGL東瀛遊平,大家買的時候可以睇下依幾間旅行社,再選一間最平的,所有都係換票證,去到日本JR換。 15/4號的比較 ?? 縱橫遊  (個網虧左,建議打電話去問下) http://new.wwpkg.com.hk/ $943 東瀛遊  EGL 東瀛遊  EGL 網頁 $965 HIS HIS 網頁 $958 JAL JAL 網頁 $941  專業旅運 專業旅運網頁 旅遊書 買左兩本旅遊書,其實原本唔打算買,因為第一本只係$20,另外一本Books.com.tw有折先買。 最後我係無帶去,因為驚超重,同埋只要上網就可以好易搵到資訊。同埋自己都去左書店煲左幾次旅遊書,大阪京都都有好多選擇,但其實裡面介紹的野無咩特別,而作為一個達人當然只係會參考而已,沒有太大必要買返本。而後者講名古屋金澤白川,我覺得吸引d,可能台灣出版社,相對無長空果種過於商業式的排版,簡紹左好多郊區地方,可惜日子錯了,上不到高地,去不到立山黑部,有機會一定要再去過!!(同埋本書超大本,所以都無帶過去) 1. 經緯文化  2015-2016年版 大阪 京都 2. おはよう名古屋+日本中部北陸精華 電話卡 當然唔會租Wifi蛋,又唔係平,又要特登去借還機,真係唔明點解要借。所以買左最平的Docomo的電話卡,$70。 想了解多d依張平卡,可以望望依個post HKEPC 日本電話卡迷思 1.5GB(過左變限速) / 八日 。 (另外唔識電話的野,就買張貴d吧,依張要啱頻率先用到,technical的野就唔講咁多)